يوم الهندسه المصرى 2013

أكتوبر 30, 2013 by saif's world أضف تعليق

#أطلق_العنان #MIE2013 #EED2013 #unleash_productivity #هندسه_أسوان

حلم … تحقق .. بفضل الله
.
المكان #Cairo_International_conference_center الزمان 20-21-22 سبتمبر
تلك الصوره تحوى داخل طياتها ما لا يستطيع اللسان قوله .. فقد دعونا الله .. وفعلنا قليلٌ مما توجب علينا .. ولكن رب العباد عطاءه جلل سبحانه وتعالى له الحمد والفضل
……….
بعد هدوووووووووووء طويل .. كل واحد فينا ف مكان اللى سافر بلده عشان يخلص ورق الجيش واللى سافر القاهره عشان يدور على شغل واللى روح بيتهم يستنى عدله :]
استعدت ذكرياتى وآلمنى فراقكم فقرر القدر أن يجمعنا بعد أن ظننا أن آخر لقاء بيننا هو مناقشه مشروع التخرج
وجدت يداى تفتح شات الفيسبوك فتختار أحمد حربى ومنه ضفت باقى الناس ف كونفرزيشن بدأت بالأتى :
“

• Conversation started September 5
• 9/5, 3:56am

  Saif Allaah

  السلام عليكم يا شباب معاكم سيف الله من قلب التفاؤل وحبيت ابلغكم رساله مهمه أحنا هناخد مركز أول أن شاء الله ف MIE السنه دى وعشان كده تقرر الآتى : 1- هنسافر مصر أحنا الاربعه ان شاء الله ف خلال يومين هنعمل البورده ف مصنع بنها وهنرجع نكمل شغل ف النخيلى 2- هنجهز بريزنتيشن جباره ان شاء الله عشان الفنان أحمد اصلاح يراجعها مره واتنين وتلاته ونستعيد الذكريات 3- هنعمل بيرشورز محترمه بتطبق ونطبع منها عدد كبير نوزعهم هناك 4- هنمل بانرين حلوين كده بديزاين حلو وينور عليه شعار هندسه أسوان 5- هبعت للمهندس يوسف ف امريكا يجيبلنا الكومبوننت كامله من دى جى كى ولا الحوجه لامثال شعير وهنعمل بورده جديده :]
  Ahmed Salah

  انا معاااااااك…يا سيف والله الرساله دي ادتني حماس جاااامد ولو ان قلت خلاص مش هنكمل…شوف هنبدأ امتي وانا بأذن ربنا معاكو

  Eman Hassan

  ايه الكلام الفظييييييييييييييييييييييييييييييع دا بجد فعلا حسستنى بالتفاؤل انا على طول باخد التفاؤل منك واكيد انت عارفنى انى اول واحده موافقه على كل الكلام اللى انت قولته دا بس عندى مشكله صغيرة جدا (ان البيت مش موافق انى اسافر عشان الاحداث اللى حاصله ف البلد ) انا هتكلم معاهم تانى انتوا ظبطوا مسافرين امتى وقولولى قبلها عشان اشوف البيت هيوافق ولا لأ ادعولى يوافقوا
  Ahmed Harby

  😀
  كلام حلو أنا كان بالنسبة لى الموضوع أنتهى بس بعد الكلام ده مش عارف الحيقية ممكن يكون رد فعلى أيه … محتاج أفكر شوية … القرارات السريعة بتبقى غير منطقية … بس لو كانت صح ( هنعدى … هنعدى … إن شاء الله ) … يا مسهل
  ………………………………………………………………………………..
  سافرنا كلنا والحمدلله وكمان معانا  طه وكوك ومعتز ووفاء وشريف وحجازى وتركى ونصارى وآيه وباهر واسلام وموسى واحمد وعبدالرحمن جاد وايسسو ومها وعبدالرحمن
  الاسماء دى كلها جايه من اسوان مخصوص عشان اليوم ده والحمدلله عدى أول يوم بريزنتيشن على خير ونزلنا م الستيج ولجنه التحكيم كانت مبسوطه من الظياطه بتاعتنا 😀
  وقفنا ف البوث وجم تانى شافوا المشروع …. عدى كمان تانى يوم وتالت يوم على خير الحمدلله .. دخلنا القاعه .. أذكر فى اليوم ده موقف ظريف عمرى ما هنساه أققوله بلسان صاحبه أحسن 😀
  Esraa Eltaweel
  ” في الحفل الختامي ليوم الهندسه المصري كنت في القاعه وحطيت شنطتي جنب ناس قاعدين عالكراسي فلقيت حد بيناديني إسراء ممكن تصورينا … ساعتها جه على بالي اللي كانوا بيهددوا انهم يجولي هناك … فلقيت اتنين عايزين يتصوروا وعاملين رابعه فسألته انت عرفت اني إسراء منين … وخدت الصوره فحكالي لو فوزنا بأي مركز ليكي هديه … فضحكت وساعه النتايج ما طلعت جامعه اسوان اخدت مركزين ولقيتهم بعد كدا بيحكولي ليكي هديتين والوأتي سيف بيكلمني يحكيلي نوصلك الهديه ازاي  ياما انت كريم يارب … #يوم_الهندسه_المصري #بهجه #أسوان_أجدع_ناس ”

  ……………………………………………….
  وبعد كده جت اللحظه الحاسمه لحظه .. لحظه النطق باسماء الفرق الفائزه .. أذكر قبلها كنت قاعد جنب لطه وقدامنا ايمان وآيه فضلنا نقلش ونقول يا جماعه بما أننا هناخد مركز أول ان شاء الله المبلغ اللى هيطلع نعمل بيه ايه وهنا بدأت الاقتراحات 😀 اللى قال  ايه رأيكم نوديه لعبعزيز يجيب بيه كمبوننت للمعمل 😀  واللى قال نوديه لجمعيه خيريه وفضلنا نضحك ونبص ف بعض ونقول يارب :]
  نادوا المركز الخامس والرابع والتالت والتانى ” كلهم جامعات معروفه وبيطلعوا بمراكز كل سنه ” وبعدها قالت هند اسماعيل مسؤله مسابقه صنع فى مصر جمله ” ولأول مره ”  😀 هنا بقى حصلت هيستيريا ما بينا وأحضان ونطنطه وبوس لا ارادى وجرينا ع الستيج نستلم الجوايز وبعد كده كنا مركز أول ف I2P الحمدلله وبرده اتنططنا وفرحنا وهللنا
  ………………………
  رفعنا اشاره رابعه وورانا ممثلين عن وزاره الانقلاب 😀 أذكر ساعتها أن فى ناس قعدت تقول نزلوا يا شباب الشعارات دى ممنوع يا جماعه واحنا عملنا نفسنا مش سامعين وبعدها نزلت الستيتس دى على الفيس ” احساس تاني لما تطلع تتكرم ف مسابقه فيها أكتر من 5000 متفرج ولما تاخد المركز الأول ويكون ضمن الناس اللي بتكرمك ممثل لوزاره الأنقلاب تروح تعمل اشاره رابعه وتحرق دمهم في حضور صحافه واعلام وتصوير”………………………….
  بعد ما خرجنا م القاعه وطبعا صحافه وقلق ومعتز خرط الخرطتين بتوعه 😀 حضنا بعض ف دايره والوحش استلم المايك وغنى واحنا معاه
  ” آه يا لليالى يا ليالى 😀 هندسه السد العالى ”
  …………………..
  أذكر ساعتها ان حجازى موبايله اتسرق وده طبعاً تكفيراً للذنوب اللى خدها ف الكام يوم دول :]
  ……………………..
  وكتبت على جروب الكليه نحمس الشباب الصغيرين البوست ده
  ” السلام عليكم ورحمه الله وبركاته
  في #MIE اتعلمنا فعلاً يعني إيه “الكنــز في الرحــلة ” .. بغض النظر عن المكسب اللى حققناه بفضل الله تعالى
  الجايزة الحقيقية كانت رحلتنا خلال سنة كاملة مع المسابقة ..
  سنة كاملة اتغيرت فيها في حياتي و تفكيري حاجات كتير جداً ..
  و اتعلمت كتير و اكتسبت خبرات أعتقد إنها اختصرت لي سنين
  الكلام اللى بقوله ده للناس اللى أصغر منى نفسى تتعلم الدرس وتبدأ تفكر بأسلوب مختلف
  إننا نكون في كليه هندسه جامعة اسوان ، فى اقصى صعيد مصر .. مع ضعف الامكانيات المتاحه ك MARKET ، ومع نقص الفرص التشجعيه ك ACTIVITIES ..
  هندسه اسوان اللى المفروض رسمياً بيبدأ فيها مشروع التخرج الترم التانى فى حين ان أغلب الجامعات المحترمه بيبدأوا مشروعهم كفكره من سنه تالته
  الحمدلله رب العالمين أخدنا مركز تانى من ضمن 5 فرق تم تكريمهم بعد تأهلنا ضمن 25 فريق للنهائيات فى مسابقه MIE من أصل 225 فريق على مستوى الجامعات المصريه بيبدأ ف مرحله تقديم فكرتهم وشرحها حسب قواعد المسابقه من بدايه السنه
  وكمان مركز اول فى مسابقه i2p عشان نمثل مصر فى البرازيل عملنا بروباجاندا كويسه وسبنا بصمة حقيقية عند كل شخص وقف يسمع فكره المشروع وازاى تعمل مشروع تخرج بيحل مشكله موجوده بالفعل … و خصوصاً النهاردة و امبارح في #EED2013 بشهادة كتير من الزوار و المنظمين وكمان المحكمين والناس اللى جات م الشركات أو الجامعات و الأهم من ده كله .. إننا رفعنا أسم هندسه اسوان وكسرنا حاجر كبير يخلي ناس بعدنا ممكن يحققوا إنجازات أكبر و يحققوا مراكز كبيرة ، ساعتها برضه هاحس إننا اللي كسبنا
  أنا بجد فخور بانى خريج من هندسه اسوان .. فخور باللى حققناه بفضل الله ..
  عايز أقول حاجه مهمه أحنا مش أول فريق يمثل اسوان ف مسابقه زى دى انا بقالى 3 سنين بحضر يوم الهندسه المصرى وشارك على مدار ال 3 سنين حوالى 4 فرق من هندسه اسوان بغض النظر عن الفوز بمركز الا انهم كانوا بجد دفعه لينا أننا نفكر نوصل للمكان ده  أحب أقولكم أن هندسه أسوان من حيث الامكانيات كمعامل وكمبوننت وTOOLS أفضل من كليات كتير .. عندنا اكتر من 4 معامل لقسم كهربا .. قوى الكهربيه والكترونيات وبى ال سى وبور الكترونيكس من أفضل المعامل اللى ممكن تشوفها وتستفاد منها .. هندسه من غير شغل عملى ملهاش لازمه المشكله الاساسيه فينا أحنا
  بعد شكر الله عز وجل أحب أوجه شكر خاص لكل شخص كان سبب ف وصولنا للمكان ده وعلى رأسهم “دكتور محمد عبدالعزيز ” وكل مهندسى معمل APEARC
  وكل شخص ادانا جرعه حماس وعرفنا بالمسابقات دى:
  فرق اسوان المشاركه فى MIE2010
  فرق اسوان المشاركه فى MIE2011
  فرق اسوان المشاركه فى MIE2012
  فريق سيمينز 2010
  فريق سيمينز 2011
  IEEE (عملت سيشن بخصوص MIE)
  نصيحه أخيره لطلبه ثالته : ” لو عايز تحس أنك عملت مشروع تخرج يستاهل وليه قيمه ابدأ مشروعك من دلوقتى ”

  بالتوفيق للجميع
  #هندسه_اسوان_نيوفيرجن

  ………………………………………
  مقتطفات من بوستات الفانز 😀 والجرايد والسايتس وغيرها
  #احمد_نور #هيما_المحمدى #كريم_عاطف #مها_أيوب #زياد_عبدالنبى #أحمد_نصير #مصطفى_الحريجى
  #لقاء_الستات_ميعرفوش_يكدبوا #أسماء_داوود #الحريجى  #تانى #صعيدى_جيكس #MIE_page  #ستيج
  #أسوان_بيج  #إسراء_الطويل #أحمد_سلوم #الكوك #لحظه_اعلان_النتيجه #الوحش #باهر #اسلام #موقع_المندره #احمد_جاد
  #الاهرام #ايمان  الاخبار #الاخبار #بوست_العبدلله #ابوصلاح #صبرى #حجازى #احمد_جاد #باهر_حصرى #مها #حربى

  …………………………………………………
  بوست أحمد حربى فى جربنا المغلق
  ”
  attention please ,

  أنا عارف إنى متأخر جدا …..
  ببساطة ألف مبروك من نجاح لنجاح ( Go forward)
  أقولكوا حاجه ……
  الطريق أبتدا ، لسه المشوار طويل جدا ، عايز مجهود أكتر و صبر أكتر …..

  أسمحوا لى أوجه كلمة بسيطة لكل واحد فيكم …
  1- سيف
  بعد ربنا و من بعده الدكتور محمد …. أحب أضربلك تعظيم سلام … مرتين … الأولى أنك أخترت مجموعه أظن أنها ممتازة … و التانية لما قتلت جونا الإحباط و خلتنا سفرنا و أشتغلنا و كسبنا ….. تحية منى للبرنس

  2- طه
  يعنى زمايل كنترول و psim و LT spice …. الوحش …. صاحب الدماغ اللى معتقدش أنى ممكن أشوف زيه تانى …. تحية منى لأجدع صاحب و أحلى دماغ

  3- أبو صلاح
  حبية الكريز …. اللى من غيرها الكيكة ملهاش أى تلاتين لازمة … أحسن واحد يلقى و يغنى و الأحسن من ده كله أنه الشيخ بتاعنا ( ربنايهدينا و أياكم ) …. تحية خاصة لأبوظلاح

  4- إيمان
  أتحملت كتير أيام ما كانت ليدر بصراحه … و لسه هتتحمل …. و أتحملت أهملنا و صبرت علينا كتير و أشتغلت كتير و أتلمت قليل جدا …. شكرا بجد … تحية منى

  5- معتز
  مع أنك زط كتير فى مصر … بس مقدرش أنى أتعلمت منك … الحقيقة أنى مكنتش أعرف أرتب أفكارى بسرعه و أكل اللى قدامى … و دى أتعلمتها منك … تحية يا معلم

  6- الكووووووووووووووووك
  بص يعنى أقول أيه و لا أيه …. محدش يعرف الكوك و دماغه زى …. لوز يا كوك … هو عارف أنه مقدمش كتير للمشروع غير فى الأخر … بس ده لأنه مبتداش معانا و خصووصا مسؤليات رئاسة الإتحاد كانت تقيلة عليه …. المهم أنه فى الأخر بان أنه له دور مهم … تحية للكوك حبيبى

  7- وفاء
  يعنى رغم أن المشروع بالنسبة ليها كان زى المشروع بالنسبة لأى حد من بره المشروع … إلا أنها بزلت مجهود كبير فى تسويقه … و على فكرة ده مش سهل … أنا عرفت قيمة اللى بتعمله بس فى الأخر ..

  8- مينا
  تحية للفلتر و الكومن مود تشوك …. أعتقد أنه شال كتير و تحمل معانا و أكتر لأنه دخل علينا و كنا وصلنا لمراحل بعيده فتته … إلا أنه كان صبور أكتر … تحية منى ليك يا معلم

  9- ألبرت
  يعنى حاول بقدر الإمكان يكون روح أكتر من أنه يكون عضو … يعنى عنا نفس ما عناه مينا … بس بردو فدنا بخبرته اللى كان مكتسبها من شغله فى الموبيلات …. و شغل العملى و البورد … تحية منى …. جشطة

  10- سارة جاد 
  محدش حس بيها … بس كانت أكتر واحدة تعبانه معايا أنا و سيف فى البداية …. ومنساش لها جهدها اللى مبخلتش بى علينا … أشتغلت كتير و لأسباب هى أدرى بيها سابت المشروع 

  11- أحمد شريف
  أشتغل معانا فى البداية بردو …. حبيبى يا أبو شريف

  12- كل الناس اللى بتدوا معانا و سبونا …. تحية و تقدير ….
  **********************************************************
  و حبت أكمل البوست بتذكرة صغيرة لناس مهمة كانت معنا ،
  بعد الحمد لله ، شكر و تقدير لكلا من ….

  1- البشمهندسة منى التى بدأت معنا المشوار و أعتطنا الثقة الغالية و وقفت بجوارنا كأخت رغم كل ما عانته معنا ، إلا أنها لم تتراخى فى أداء مهمتها معنا حتى النهاية

  2- البشمهندس ياسر نور الرجل الذى لم أجلس معه سوى مرة أو مرتين على الأكثر إلا أنى تعلمت معه أشياء كثيرة و عديدة ، رغم بستطها إلى أنها كانت بالنسبة إلى مهمه

  3- البشمهندس أحمد شوقى رغم أنه لم يجلس معنا إلا مرة أو مرتين ، و لكن كان دعمه فى بعض القرارات الحاسمة التى أضافت لنا و للمشروع بكل تأكيد مهم جدا

  4- البشمهندس أحمد شعير ، رغم كل ما عنيناه معه و عاناه معنا إلا أنه أضاف لنا و لو القليل ، و أعترف بأن الفترة التى كان فيها هو المشرف أكثر فترة عملنا فيها كفريق

  5- البشمهندس أحمدجاد و البشمهندس عبدالرحمن جاد ، على الإهتمام و الفرحة التى أعتطنا مزيد من السعادة ، و المساعدة الكبرى فى تقدم مستونا

  6- كل البشمهندسين الموجودين فى معمل APEARC على المجهود الرائع و النصائح الغالية

  و طبعا دكتو محمد ، اللى معرفش ممكن أشكره أزاى و بأى كلام ، حقيقى أنا فخور أنى أتعملت مع واحد زى الدكتور محمد ، علم أخلاق ، إنسان بمعنى الكلمة نفتقده فى هذا العالم …..

  طبعا أنا عارف ، إن طه هيقول أيه الملل ده و هفضل أقرأ ده كله
  سيف هيفضل يضحك و يقول أيه العطل اللى بيعمله حربى ده
  أحمد صلاح حبيبى هيقرأ و يمل و ميكملش عشان فى ناس أهم و فى أغانى ( نجم بقى )
  إيمان هتقرأ البوست كامل
  الكوك مش فاضى لى أساسا
  معتز و وفاء أتمنى يقروا البوست كامل

  على فكرة أنا عارف أننا أختلفنا كتير ، بس دايما كان فى رابط ما بنا ، مهما كان الإختلاف كنا بنشتغل مع بعض ، دايما كنت بثى على الفريق و كنت حاسس أنه فيه ميزه عن غيره

  جايز أنا أكون مش شايف أننا عملنا أنجاز … بس الإنجاز أننا نفضل مكملين … بكرة هيبقى أحسن من أمبارح …. Team Work …. بحلم بأن سيف يرفع علم مصر فى البرزيل و يكون حاصل على المركز الأول … لا زم نشتغل بجد الأيام اللى جاية …

  و أخيرا
  Go Forward
  سلام …. معلش طولت جدا أنا عارف … بس دى سنه كاملة ناس كتيييييير مرت علينا”
  ……………………………………………………………………………………………………………………………………………………………………….
  .
  عدت الايام وبقيت ذكريات جميله وحلوه كل ما أخش ع البلوج دى أكيد هندمع ونبكى ونضحك م اللى فيها ..
  الهدف الاساسى م المونه كاتبه ف بلوج لوحدها ” وهو التوثيق ” عشان الذاكره بتخونى مش أكتر
  ………………………………………………………………………………………………………………………………………………………………………..

  خلصنا المسابقات دى وأذكر كريم جوده 😀 والألش الحلو اللى كان ما بينا بعد المسابقه على حاجات معينه حصلت 😀 خلتنى أقف مع نفسى كتير  وتذكرت حاجه مهمه لازم تتنقش ف الدماغ وتتحفر كمان
  أولها
  ” من لم يشكر الناس لم يشكر الله عز وجل ”

  وآخرها
  : قال تعالى” أفمن زين له سوء عمله فرءآه حسنا فإن الله يضل من يشاء ويهدي من يشاء “صدق الله العظي
  مبسم الله الرحمن الرحيم لَا تَحْسَبَنَّ الَّذِينَ يَفْرَحُونَ بِمَا أَتَوْا وَيُحِبُّونَ أَنْ يُحْمَدُوا بِمَا لَمْ يَفْعَلُوا فَلَا تَحْسَبَنَّهُمْ بِمَفَازَةٍ مِنَ الْعَذَابِ ۖ وَلَهُمْ عَذَابٌ أَلِيمٌ. 188 سورة آل عمران صدق الله العظيم . كما جاء في الصحيحين عن النبي صلى اللّه عليه وسلم : (من ادعى دعوى كاذبة ليتكثر بها لم يزده اللّه إلى قلة} وفي الصحيحين أيضاً: المتشبع بما لم يعط كلابس ثوبي زور